"Moussu Poincaré nous vòu plu louja", un pouèmo de pialut

Albert Boudon-Lasherme èro un felibre d'ataco. Sourtit del Velai nasquè al Puèi lou 22 de febrié de 1888.

Durant la guerro de 14 creè e animè la revisto "L'Ecò dei Bousquetou" en auvernhat am' en prouvençau. Per poudé s'abouna chalio èsse en primièro lìnio ou nafrat.

Vaqui un pouèmo qu'escriguè :


 

Moussu Poincaré, noste prouprietàri, nous vòu plus louja

Nous o jitas per la charrèiro
Lou presidènt aquel mati
Fasio frei à fendre la pèiro
Mas nous o bi chaugu parti....

E pamen erian, cambarados,
Urous e gai en soun oustau,
Lou mai gentou de l'encountrado
Lou mai supèrbe, lou pu chaud.

Ié mancavo bi quauco plancho,
Quauco tiéulo per lou coubèrt,
E de petas de nejo blancho
Ié prenien si quartiés d'ivèr.

Cado ser, sus moun lèi de paio,
Me i estirave bravounet,
Lei chambos freidos din mei braios,
L'auriho amai din moun bounet.

Vivamen passave ma pato
Dessoubre moun mourre e moun nas
Coumo fai près dei fiò na chato,
Ah, i en avio de floucounas !

Mas ère ben urous encaro
De ié dourmi tranquilamen,
E Moussu Poincaré toutaro
Que nous chasso dei loujamen !

Ount' anaren, l'amo marrido
Querre anuei un apartamen
E gagna nosto pauro vido
E nosto paio ounèstamen ?

Ounde nous en anaren jaire,
Auren pu ni fiò ni coubèrt
Restaren deforo, pecaire
Au siblamen dei vent d'infèr ?

Franchamen, cò'i pas charitable,
Moun bon moussu lou Presidènt,
De manda de soudards au diable
Per aquel frei viéu e mourdènt.

Aven garda vosto oustalasso
Que lous oubus an espança
E que badavo din la glaço
Amé soun casque defounça.

I aven, car sian de brave mounde,
Garda lou moubilié tant bèn,
Que pense pas que se i escounde,
De poussièro, moun presidènt.

E din lei legiouns militàri
Crese bi qu'aurés amoundaut
Jamai tant braves lougatàris
Coumo n'avias din noste oustau.

                   G. de la Malouteyro  (= Boudon-Lashermes)

Revisto "L'Eco dei Bousquetou"

nouvèmbre de 1916